DALAWANG K

Dalawang malalaking event meron nuong Lunes. Isa ay ang anibersaryo ng Iglesia ni Cristo na tinatatag ni Ka Felix Manalo 95 years na ang nakaraan. Lumaki at lumawak ang INC at ngayon ay nasa lahat ng panig ng mundo.
Ang kanilang mga miyembro ay nasa milyon na pero hindi sila tumitigil sa pagpapalawig ng SALITA NG DIYOS, ang layunin ng pagtatag nito ni Ka Felix Manalo nuong taong 1914 sa Punta, Sta. Ana.
Patuloy na dumarami ang kanilang mga kasapi dahil naman sa walang pagod na pagpapalawig ni Ka Erano (Ka Erdy) Manalo na siyang Punong Tagapamahala na humalili kay Ka Felix, ang Sugo.
Ang pangalawang event ay ang ika siyam na State of the Nation Address ni Madam Senyora Donya Gloria. Ang Sona ay siyang mensahe na dapat ibigay ng naninirahan sa Malakanyang (pasensya na ho kayo talagang hindi ko kayang tawagig ang isang huwad na Pangulo) kung ano ang tunay na kalagayan ng bayan at ano ang mga gagawin niya at plano sa susunod na taon.
Sa lahat ng nakaraan niyang Sona walang ganuon. Imbes ang mga laman ay pawang kasinungalingan o pangakong nilista sa tubig.
Sa event ng INC na Linggo pa nagumpisa ay kitang kita natin ang pagmamahal ng mga miyembro ng INC sa kay Ka Erdy. Dinig na dinig ang pagiyak ng marami na naantig sa kanyang mensahe. Pangitang pangita rin ang kanilang kagalakan at pagmamalaki na sila ay miyembro. Ultimo tayo ay naantig at naapektuhan.
Malinaw na malinaw ang pagkakaiba ng dalawang event. Isang puro katotohanan at isang puro kasinungalingan.
Katotohanan ay ang patuloy nag pagsisikap ni Ka Erdy, ni Ka Eduardo at mga opisyal ng INC na palaganapin ang SALITA NI JESUS CHRIST. Katotohanan rin ang simpleng pamumuhay ni Ka Erdy at ng kanyang pamilya. Walang luho at nagsisilbing ehemplo sa lahat na siyang umeenganyo sa iba pa na sumapi sa kanila.
Katotohanan rin na ang pagpapagaan sa buhay ng kanilang mga miyembro. Natutulungang mabigyan ng trabaho ang mga kasapi. Ang pondo naman ng INC ay nailalagay sa mga tamang proyekto gaya ng New Era College na hindi lang pala sa Central kung hindi sa iba’t ibang panig ng Pilipinas.
Maayos rin ang kanilang ospital at grabe ang kanilang mga pabahay sa mga miyembro. Lahat ng magagawa ginagawa nila upang mapaginhawa at matulungan ang lahat ng kasapi.
Ultimo mga hindi kapatid sa INC ay kanilang tinutulungan lalo na sa oras ng kalamidad.
Kasinungalingan naman ang lahat ng pinagsasabi sa SONA. Kasinungalingan na nadagdagan ng trabaho. Kasinungalingan na dumami ang nagkabahay. Kasinungalingan na nabawasan ang nagugutom. Kasinungalingan na kumonti ang mga mahihirap. Kasinungalingan na inaalagaan ang demokrasya.
Malinaw na malinaw, isang pawang katotohanan, isang punung puno at hitik na hitik sa kasinungalingan. KATOTOHANAN AT KASINUNGALINGAN.

MANINDIGAN LABAN SA ILIGAL NA DROGA

Marami ang naginit ang kilikili. Marami ang nagalit at gustong ibalik ang parusang kamatayan samantalang ang mga taga Philippine Drug Enforcement Administration ay nangakong hindi tatantanan ang mga nagtutulak ng iligal na droga pagkatapos lumabas ang balita na isang dalagitang anak ng isang ahente ng gobyerno na lumalaban sa droga ang dinukot at pinagsamantalahan.
Kaso ng malamang hindi pala ito ang tunay na pangyayari at nakipaginuman lamang ang dalagita at sa takot sa amang mahigpit ay hindi umuwi ay lumamig ang karamihan kasama na ang Malakanyang.
Bigla silang nanahimik na para bang sinasabing okay lamang na hindi muna magkaroon ng matinding kampanya laban sa iligal na droga dahil hindi pa naman ginagalaw ng mga sindikato ng iligal na droga ang pamilya nila.
Mukhang mali na naman ito at maihahalintulad na naman natin sa mga ibang kampanya ng administrasyon ni Madam Senyora Donya Gloria na puro umpisa at press release lamang.
Bagama’t mabuting hindi naging totoo ang balita, dapat pinagpatuloy ang kampanya laban sa iligal na droga. Hindi dapat bumalik ang status quo kung saan may ilang huli pero tuloy tuloy rin ang paghahasik ng lagim ng mga drug lord.
Muli tayo nananawagan lalo na sa PDEA at iba pang ahensya ng gobyerno kontra droga na pagibayuhin ang kampanya laban sa mga drug lord at pusher. Naninindigan tayo na dapat sa mga iyan ay lipulin.
Hindi sila dapat bigyan ng anumang human rights dahil uulitin natin, mga demonyo sila na naganyong tao lamang.
Sa kampanyang ito man lang manindigan si Madam Gloria na personal pang namumuno rito bilang anti drug Czarina.
******
Grabe and anunsyo ni Sen. Mar Roxas at ni Sen. Manny Villar. Walang humpay ang kanilang mga commercial sa telebisyon na animo’y mababait sila at malinis na malinis ang hangarin.
Kahit ano ang sabihin nila, malinaw na pamumulitika ang ginagawa nila at ang katotohanan ay nakakasuka na ito.
Kung talagang nais nilang tumulong sa ating mga kababayan, huwag nila aksayahin ang daang milyong piso nila sa mga commercial kung hindi ilagay ito sa mga proyektong makakatulong sa pagpapaangat ng kabuhayan ng ating mga kababayan.
Sa mga kababayan naman natin, pakiusap ho na huwag niyo paniwalaan ang mga ganuong uri ng pagpapasikat. Tandaan natin na binayaran nila ang commercial na iyan kaya parang pelikula iyan na may script at director na sinusunod.
Arte lamang ho ang mga iyan at gawa lang ng mga magagaling na advertising people. Sana huwag tayo paloko. Ang piliin natin isang taong tunay na iaahon ang bayan sa kahirapan, lalo na ang mga kabataan na siyang ating kinabukasan.
Huwag ho tayo paloloko.
******
Mga nais mag komento tungkol sa ads ni Sen. Roxas at Villar, text o e mail lamang ho kayo ng sagot. Interesado ho kaming malaman ang opinion ninyo.

UUBUSIN ANG MGA TAONG NAGTUTULAK NG DROGA

Inalis niya ang parusang kamatayan para sa mga gumagawa ng karumaldumal na krimen gaya ng pagbebenta ng iligal na droga. Isang kilos na pagpapakita ng kalambutan ni Madam Senyora Donya Gloria laban sa mga sindikato ng iligal na droga.
Dahil diyan, isang 13 – anyos na anak na babae ng isang anti drug agent ang dinukot, ginahasa at sinaksakan pa ng maraming droga. Base sa mga naunang balita, state of shock pa ang kawawang menor de edad na ang tanging kasalanan ay may amang lumalaban sa iligal na droga.
Tiyak rin natin tumataas ang bilang ng mga biktima ng iba’t ibang krimen na gawa ng iligal na droga, kasama na riyan ang mga ordinaryong mamamayan na nasasaksak at nananakawan.
Pero hindi sana mangyayari ito kung mula umpisa ay pinatupad ang parusang kamatayan sa mga involve sa iligal na droga lalo na ang mga drug pushers.
Kaso, kesa ipatupad ito ni Madam Gloria ay mas minarapat alisin ito.
Kayo Madam Gloria ang sinisisi namin sa nangyaring ito at sa lahat ng iba pang mangyayari. Kayo ang nag-alis ng parusang kamatayan sa mga halang ang kaluluwa.
Gaya ng paulit ulit nating sinasabi, walang human rights ang mga taong iyan. Katotohanan nga ay mga demonyo ang mga iyan na nag-anyong tao. Hindi sila dapat kaawaan. Ang dapat ninyo kaawaan ay mga biktima nila.
Ang ginawa nilang ito ay isang paghamon na hindi dapat ipagwalang bahala. Panahon ito upang lipulin sila. Walang silbing ipakulong ang mga taong iyan. Kahit nasa piitan kaya nilang ituloy ang kanilang masamang gawain. Hindi sila dapat bigyan ng due process at kahit anong uri ng human rights. Tahasan nating sasabihin, patayin ang mga iyan.
Tanging solusyon ay lipulin ang mga iyan. Diyan tayo nanghihinayang na wala sa ehekutibo ang mga katulad ni Sen. Panfilo “Ping” Lacson at Davao city Mayor Rodrigo Duterte.
Pagkatapos lipulin ng mga taong iyan, ibalik ang parusang kamatayan lalo sa mga nagtutulak ng iligal na droga. Wala dapat palusutin dito kahit anong lahi. Tingnan niyo ang Singapore na pinatutupad ito kaya walang kaso ng iligal na droga kahit isa.
******
Sa mga nais pumasok sa Nacionalista Party ni Sen. Manny “Singit at Taga” Villar dahil nais tumakbo sa anumang posisyon sa akala niyong mabibigyan kayo ng malaking suportang pinansyal, magisip isip muna kayo.
Kung hindi rin lang kayo super lapit sa mga Villar o ilang malalapit na kaalyado nila ay huwag na kayong umasa.
Ito ang natuklasan ng isang nais mag senador na kasapi pa ng partido ni Villar. Komo kasali na siya at hindi na kailangang sulutin sa iba pang partido ay walang tulong na binibigay sa kanya.
Hindi ito kagaya ng isang bagong pasok na aba, P2 million pesos ang binigay agad agad at may pangako pang P10 milyong kasunod pa.
Ang nagkakalat pa ng balitang ito ay ang nakatanggap na nangangarap na mag senador. Pakapalan niyang kinukuwento ito at pagmamalaki pang bago magumpisa ang eleksyon ay makukuha niya ang pinangakong halaga bago magumpisa ang halalan.
Hindi pa man din palakasan na at pera pera ang usapan.

BIYAHE NA NAMAN

Tumulak na naman patungong Egypt nuong Lunes si Madam Senyora Donya Gloria. Hindi na ho natin maalala pang ilang biyahe niya ito pero ang natitiyak natin ay mahigit P3 bilyong piso ang ginastos niya sa kanyang mga biyahe.
Gastos lamang ho iyan sa hotel, eroplano at mga opisyal na meeting niya gaya ng pag hohost ng almusan, pananghalian o hapunan at kahit meryenda. Hindi pa ho kasali riyan ang mga gastos para sa shopping hindi lamang ni Madam Senyora at ng kanyang pamilya kung hindi mga alalay sa biyahe.
Puwera din diyan ang para sa mga kaalyadong mga kongresista na siyempre kung saang hotel nakatuloy si Madam duon rin sila. Hindi rin kasali diyan sa P3 bilyong piso ang baon nila na siyempre hindi naman puwedeng daang dolyar lamang, kailangan siyempre ay libong dollar. Tandaan natin, sa isang libong dolyar ay halos P50,000 pesos na ito. Ilang araw lamang na gastusan ito, sa ilang mga kongresista nga, lalo na mga babaeng kongresista ay kulang pa ito para sa isang bag.
Masarap nga namang gumastos lalo na at hindi naman nila pera. Bukod nga rin pala ito sa sariling dalang pera ng mga kongresista o kaya’y charge nila sa credit card nila. Tiyak naman kasi na may magbabayad nito gaya ng mga kontratista o supplier na siyang may hawak ng kanilang mga pork barrel.
Hindi rin ho kasali ang gastos para sa asawa o di kaya’y girlfriend ng miyembro ng kongreso na pinasusunod kung saan nagtutungo si Madam at siyempre may hotel accommodations, pagkaing masasarap at higit sa lahat shopping money. Sarap talaga gumastos ng perang hindi kanila.
Magandang pagsulat ng P3 billion pesos ay 3,000,000,000.00. Isipin niyo gaano kalaking halaga ito. Sa sinulat nating ito, asahan niyo na hindi lang doble ito kung isasama ang mga nabanggit natin gaya ng baon, pasalubong, hotel at pagkain at panggastos ng mga misis, chicks, pamilya at kung ano ano pa.
Tiyak aabot ito ng P6 billion pesos o 6,000,000,000.00. Sobrang laki ito na ayon nga kay Sen. Chiz Escudero ay malaki pa sa budget ng ilang mga malalaking ospital at unibersidad.
Tama rito ang sinabi ni Sen. Chiz. Alam na alam naman ng ekonomistang si Madam Senyora Donya Gloria gaano katindi ang hirap ng sambayanan at sana naisip niya kung ilang estudyante ang mapag-aaral ng laki ng ginastos niya. Pero umaasa pa ba tayo na magbabago siya at magpapakita siya ng pagmamalasakit sa sambayanan.
Siguro hindi na, wala ng pagasa, kakalungkot pero kahit sa kanyang huling sandali (iyan ay kung hindi maisakatuparan ang anumang masamang planong palawigin ang termino at manatili sa Malakanyang) walang gagawin para sa bayan, para sa bayad maaari at sa bulsa at sa sarili.

PUPULBUSIN NA NAMAN ANG ABU SAYYAF

Pinalaya na ng bandidong grupong Abu Sayyaf si Eugenio Vagni, isa sa tatlong miyembro ng International Red Cross, na kinidnap nila sa Mindanao.
Nauna rito ay nakatakas ang dalawang kasama ni Vagni na sina Andreas Notter at si Mary Jean Lacaba. Nahirapang sumabay ang huling pinalaya dahil may sakit nga ito at buong akala ng marami ay nabawian na ng buhay. Mabuti naman ay nailigtas sa kamay ng mga bandido si Vagni kapalit ng halagang ayaw aminin ng mga bataan ni Madam Senyora Donya Gloria. Ayon kay Defense Secretary wala raw binayad na ransom.
Sige na nga kung iyan ang pinagpipilitan niyo pero ang inyong lingkod hindi naniniwala dahil hindi papayag ang mga kaluluwang Abu Sayyaf na palayain ang kanilang mga bihag ng walang kapalit na “board and lodging.”
Sa paglaya ni Vagni na ilang buwan ring nabihag ay mga kababayan na lang nating mga taga Mindanao ang hawak nilang mga hostages kaya asahan natin na babakbakan na naman ng mga military ang tulisang ito.
Ni minsan ho ay hindi natin tinuturing na rebelde ang mga Abu Sayyaf, sila ho ay mga pusakal, mga criminal, mga bandido at walang prinsipyong pinaglalaban maliban sa gumawa ng masama upang kumita.
Panalangin lamang natin ay mailigtas ang mga kababayan nating mga bihag nila, kasama ng mga guro ng kanilang kinidnap at pinatutubos kahit maliit na halaga. Dito niyo makikita na halang ang bituka ng mga taong ito.
Anyway, bago tayo ma high blood, nais nating paalalahanan ang mga pinuno natin, lalo na ang Malakanyang at mga taga Department of National Defense na sana ay payagan nila ang mga sundalo na nasa field ang siyang dumiskarte at ubusin ang mga walanghiyang ito.
Hindi sila dapat makialam at biglang pipigilan ang mga sundalo na alam nating madaling masalikupan ang mga Abu Sayyaf.
Mahirap kasi maulit ang mga nangyari nuong araw kung saan maraming sundalo ang nagbuwis ng buhay at lumaban sa mga Abu Sayyaf pero ng napapaligiran na ang mga ito o nagtatago na sa mga lungga ng mga rebeldeng grupo sa Mindanao ay aawatin.
Naalala natin ang kuwento ng isang sundalo na nagresign sa posisyon dahil alam nilang kuha na ang mga criminal pero isang tawag mula sa Malakanyang ang nagpaatras sa kanila.
Ayun, tuloy ang paghahasik ng lagim ng naturang grupo na sinira pa ang imahe ng ating bansa. Mukhang Somalia na tayo kung saan walang gobyerno. Paalala lamang natin ang ginawa ng naturang grupo nuon ng kidnapin at patayin ang isang missionary na siyang dahilan ng ating kahihiyaan sa buong mundo.
Itong huling ginawa nila kung saan pati ang Red Cross na hindi naman ginagalaw kahit saan ay sumira sa ating pangalan at matatagalan bago tayo makabawi.
Nuong Lunes ng umaga ang mga hirit na naman ng mga opisyal natin (lalo na ang mga political leaders pati ang Malakanyang) ay pupulbusin na ang Abu Sayyaf.
Ngayon nga lang, sana hindi pulbusin kung hindi paulanan ng bala o di kaya’y tadtarin ng saksak at gawing fertilizer upang kahit paano ay pakinabangan.

Naguumpugang Bato

Iyan ang pinaka ukmang larawan ng ating bayan ngayon. Bakit kanyo? Simple ho, ang unang bato ay si Madam Senyora Donya Gloria kasama si Sir Senyor Don Jose Miguel Pidal Arroyo, ang kanilang mga anak, kapamilya, kapuso, kasabwat, kakutsaba, kapartido at kasamahan.
Ang pangalawang bato ay ang hanay ng oposisyon, ang civil society at ang pinakamahalaga ay ang sambayanan na kontrang kotra sa grupo nila Madam Senyora Donya Gloria.
Hanggang may magagawang paraan ay ipipilit ni Madam at ang kanyang mga alipores na manatili sa poder. Lahat ng paraan gagawin nila hindi nila lisanin ang Malakanyang. Kahit ano ang ipukol sa kanila ay pagpipilitan nila manatili rito at napatunayan ito ng balewalain nila lahat ng iskandalong bumalot sa kanila gaya ng Jose Pidal, Hello Garci, ZTE at kung ano ano pang iba.
Alam nila na pagnawala sila sa poder ay pagbabayarin sila ng sambayanan sa lahat ng kasalanang nagawa nila. Iyan rin ang isa sa dahilan bakit lahat ng tauhan niya mula sa mga miyembro ng gabinete hanggang sa mga nanungkulan sa mga magagandang puwesto ay nais tumakbo bilang senador, kongresista at iba pa sa halalan sa 2010.
Lahat ng paraan iniisip at isasagawa nila upang hindi bitiwan ang hawak nila kapangyarihan. Wala silang pakialam kung ito ay idadaan sa santong dasalan o santong paspasan. Pinakita nila ito nuong Edsa 3 kung saan pinagbabaril nila ang mga kababayan nating ang tanging kasalanan lamang ay mag-rally at naisin na alisin sila sa Malakanyang sa paraang ginawa nila kay dating Pangulong Joseph “Erap” Estrada.
Ang kabilang grupo naman, gaya ng mga presidentiables pati mga pekeng oposisyon na mahilig sa mga singit at taga at mga alipores at mga bataan nila ay nais na pumuwesto muli. Matagal na silang gutom at katuwiran nila ay panahon naman nila.
Ang civil society naman kasama ng mga grupong relihiyon at negosyante ay nais lamang ng isang pagbabago na siyang magbibigay naman sa kanila ng pagkakataong mamuhay ng mas matihimik. Kasama ng mga grupo ng mga maralitang nakatira sa kanayunan at sa siyudad ay nais nila magkaroon ng pagbabago kung saan mabawasan man lang ang mga pangungurakot upang kahit paano ay maitulong ang pamahalaan sa mga social services gaya ng pag-aaral, gamot, pabahay at iba pang pangunahin pangangailangan ng sambayanan.
Hindi sila makakapayag na manatili si Madam at kanyang mga kasabwat na manatili sa puwesto pagdating ng July 2010. Nanaisin nila na isang mas maayos na tao ang nakatira sa Malakanyang. Isang taong makakapagbigay sa ating lahat ng pagasa at inspirasyon na makakatulong sa ating pangarap na umahon na muli ang ating bayan at manumbalik an gating dignidad.
Dalawang grupo ito, parehong magkasalungat at hindi maaaring magkasundo kailanman. Tiyak na maglalaban ang dalawang ito at pareho namang kayang magbigay ng impluwensiya sa military at pulis. Si Madam sa pamamagitan ng panunuhol sa kanyang mga heneral at ang nasa kabila na liligawan naman ang mga matitino at mga idealistic na sundalo.
Naguumpugang bato at ang tanong lamang alin ang batong madudurog. Alin ang bibigay. Huwag sana pero ngayon pa lang prediksyon ko lalaki pa ang gulo gaya ng mga bombahan at malabong umabot sa eleksyon ng 2010.

NUKNUKAN NG SINUNGALING

Iyan lang ang pinakaukmang salita para kay Madam Senyora Donya Gloria at kanyang mga tagapagsalita tungkol sa pagkakabuking sa kanya na may matindi siyang karamdaman at ito ay problema sa kanyang dibdib (ayaw natin gamitin ang mas angkop na salita dahil medyo malaswa) na binulgar ng isang kaibigan at hinahangaan nating kolumnistang si Jarius Bondoc.
Una ang todo tanggi pa itong si Presidential Spokesman Cerge Remonde na kung may kahihiyaan pang natitira ay dapat lumayas na sa palasyo. Kaso gaya ng marami sa kanila, wala ni konting delikadesa at kahihiyaan kaya nandun pa.
Bigla siyang kambyo kasama ng isa pang tagapagsalita na si LoreLIE Fajardo dahil totoo raw pero hindi raw ito dapat pagusapan ng sambayanan dahil masyado raw personal ang karamdaman ng kanilang boss.
Aba, nakakalimot sila na mula umpisa ay nasa plano nila ang lokohin ang sambayanan. Sinabi nila na mag seself quarantine raw si Madam Senyora Donya Gloria dahil sa lumalaganap na sakit na swine flu.
Nang bukuhin ni Jarius, deny to death sila at hindi naman daw sexy star si Madam Senyora Donya Gloria para magparetoke ng boobs. Pero nung nahalata nila na buking na buking na ay inamin ito pero may biopsy lamang daw ginawa at wala naman daw masamang natuklasan.
Lunes ay hirit pa ang National Bureau of Investigation (NBI) at sinabing iimbistigahan ang sinumang doctor, nars o empleyado ng ospital na siyang naglabas ng balita na binulgar ni Ginoong Bondoc.
Sabi ng NBI may violation raw ito ng confidentiality ng patient at doctor. Hindi kaya nila naisip na mas matinding violation ito ng saligang batas natin na nagsasaad na dapat sa ating pinuno ay transparent ang medical condition at kailanman hindi maaaring tinatago ito.
Mula umpisa, planado ang pagtatakip kaya kung may dapat kasuhan silang mga iligal na nakatira at nagoopisina sa Malakanyang.
Kakahiya, gaya ng madalas sabihin ng matatanda ang sinungaling ay kapatid ng magnanakaw at mandaraya. Sa kasong ito, hindi lamang ho magkakapatid kung hindi magkakasama, mag-asawa, maganak, magpamilya at higit sa lahat magkakakutsaba.
Nuknukan talaga ng sinungaling.
******
Sana maayos ni Gen. Art Lumibao ng Land Transportation Office ang kakulangan ng plaka na nagiging dahilan para kikilan ng mga magagaling na pulis, MMDA at iba pang mga law enforcement agency ang mga motorsiklong bayad pero walang plaka.
Hindi ho kasalanan ng mga pobreng naghuhulugan ng motorsiklo bakit wala ang plaka. Nagbayad na sila ng rehistro pero ang walang maibigay ng plaka ay tanggapan niyo.
Karamihan sa mga nagmomotorsiklo ay nais makatipid ng konti sa pamasahe at makarating sa paruruonan ng magaan ang trapiko. Huwag niyo sila pahirapan.
Maawa kayo sa kanila at habulin niyo ang gumagawa ng plaka na kahit malaki ang kinikita ay hindi makapag deliver ng maayos.
Sa mga nangingikil, mahirap ipakain sa mga anak niyo ang perang hinuthot niyo. Isusubo na lang ng mga pobreng kababayan natin inaagaw niyo pa. Gabain sana kayo.

PALASYO ANG MAPAPASO

Nagpaalam si Interior and Local Government Secretary Ronaldo Puno dahil kailangan niya raw magpagamot sa Estados Unidos. Pansamantala namang papalit sa kanya si Public Works and Highways Secretary Hermogenes Ebdane.
Ayon ito kay Executive Secretary Eduardo Ermita na pinabulaanan naman ni Brian Yamsuan, ang tagapagsalita ni Puno na nagsasabing nasa US lamang ang kalihim dahil ikakasal ang anak.
Sunud sunod rin ang putukan ng bomba (kwitis pala) sa Metro Manila. Andyan ang pagpapasabog raw sa Ombudsman at mga natuklasang bomba sa Department of Agriculture.
Natural todo tanggi ang Malakanyang at ang mga kilos na ito ay gawa raw ng mga kalaban nila na nais maghasik ng gulo. Tanong lamang ho natin, sino ba makikinabang pag nagkagulo? Pagkaalala natin nuong huling may gulo gaya ng take over sa Manila Peninsula ay nabigyan ng dahilan ang mga bayarang heneral ng Armed Forces of the Philippines at Philippine National Police na harassin ang mga miyembro ng oposisyon at mga kritiko ng pangulo nila.
Pasok naman sa eksena ang Commission on Election at balik raw tayo sa bilangan na nakasanayan ni dating Commissioner at Presidential phone pal Virgilio “Garci” Garcillano at Lintang Bedol. Hindi raw magkasundo ang Total Information Management Corporation at ang Smartmatic. Ang TIM ay kumpanyang Pinoy na base sa Cebu samantalang ang Smart ay hindi natin malaman kung sa Venezuela, Netherlands of Barbados.
Binigla nila ang lahat sa hirit na ito dahil mas sigurado sila sa lumang sistema ng bilangan (iyan ay kung magkakaeleksyon). Katunayan ay merong mabigat na taong tumawag sa opisyal ng TIM at sinabihan itong umatras. Sino ang taong ito? Pulitikong galing sa malaking angkang taga Bisaya at malapit na malapit kay Madam Senyora Donya Gloria. Ang probinsiya rin ng pulitikong ito ay pinagmulan rin ng isang super lapit na negosyanteng partner ni Sir Senyor Don Jose Miguel Pidal Arroyo.
Kasabay naman nito ang paguwi ni Madam Senyora Donya Gloria mula sa kanyang pamamasyal kasama ang kanyang pamilya at mga kaalyado sa kongreso sa iba’t ibang panig ng mundo kasama na ng Columbia at Hongkong at anunsyo na magkukulong muna ito upang hindi makapanghawa dahil baka may dala siyang virus ng swine flu o sakit na galing sa baboy.
Kung quarantine nga naman siya, madaling sumagot na wala akong kinalaman diyan, ni hindi ko sila kinanakusap o nakikita. Wow na wow.
May mangyayari, may mga plano, may mga pakulo na pakukuluin ng husto dahil mga kilos na kakaiba at patunay muli sa sinasabi natin nuon pa na walang plano magpaalam si Madam Senyora Donya Gloria.
Masyado nilang ginugulo at hinahaluan pa nitong planong pagbabago sa Saligang Batas upang manatili sa Malakanyang si Madam Senyora Donya Gloria.
Kinokondisyon ang utak natin na magiging magulo ang mga susunod na araw o buwan. Sinasanay ang pagiisip natin na anytime maaaring may biglang pangyayari pero ano ito?
Kailangan natin paghandaan ito, huwag tayo padadala sa pananakot. Magagawa lamang nila ang masamang plano kung titiklop tayo, alam nila ito kaya nga sinusubukan tayo, dinadahan dahan.
Mabigat ang pinakukulo nila pero tiyak ba nila na hindi sila ang mapapaso. Ingat kayo, baka kayo ang mapaso dahil ang Pinoy nagpupumiglas na ang galit, kumukulo na rin at umaapaw na nga ang marami.

GALING TALAGA NI MADAM GLORIA

Hinihiling ni Sen. Panfilo “Ping” Lacson na imbistigahan ng senado ang mga biyahe ni Madam Senyora Donya Gloria samantalang binulgar naman ni Sen. Francis “Chiz” Escudero na mahigit tatlong bilyong piso na ang nagastos sa biyahe pa lamang sa iba’t ibang panig ng mundo.
Sagot naman ng Malakanyang ay dapat tingnan muna ng mga miyembro ng oposisyon at mga kritiko ang mga benepisyo ng mga biyaheng ito.
Dahil sa sagot na iyan ng Malakanyang ay naisip natin na tingnan nga mabuti ang bunga ng mga biyahe ni Madam Senyora Donya Gloria.
Una, nabola niya ang mga opisyal ng China at nakumbinsing pautangin ang bansang Pilipinas. Dahil sa husay niyang iyan, nagkaroon ng mga kontrata sa pagitan ng Pilipinas at China na gaya ng ZTE – NBN deal na siyang magbabaon sa utang sa sambayanang Pilipino. Pinamigay niya rin ang Spratley Islands, patunay na galing niya sa larangan ng diplomasya.
Pangalawa, panay ang pakiusap niya sa mga opisyal ng mga bansa sa Gitnang Silangan na siyang naging dahilan naman na kesa dumami ang trabaho rito sa atin para sa ating mga kababayan ay patuloy na sinusulot ang mga magagaling nating mga propesyonal na siyang dahilan ng brain drain.
Bukod pa riyan ang patuloy na pagpapahirap sa mga kababaihan natin sa mga bansang ibang iba ang kultura kaya lalo lamang nagiging biktima ng panggagahasa, pambubugbog at iba pang uri ng pagpapahirap.
Ikatlo, walang tigil na pamamasyal niya pati sa bansang Columbia sa Latin Amerika na mas kilala sa pag poproduce ng droga. Ito marahil ang dahilan kaya ngayon ay nilagay na tayo ng United Nation bilang panlima sa buong mundo bilang producer ng shabu.
Ikaapat, habol siya ng habol kay US President Barack Obama na siyang dahilan bakit lalong bumaba ang tingin ng mga Amerikano sa atin at iba pang mga bansa na tahasang nagsasalita sa pamamagitan ng kanilang media na bakit walang ginagawa ang sambayanang Pilipino kahit patuloy tayong inuuto, ninanakawan, dinaraya at niloloko ng ating pamahalaan.
Ikalima, pinakikita ni Madam Senyora Donya Gloria, Sir Senyor Don Jose Miguel Arroyo, mga anak at apo ang halimbawa kung paano mamasyal sa buong mundo at maging international tourist sa paraang hindi paggamit ng sariling salapi. May dahilan rin siya gumamit ng pera ng bayan sa mga advertisements sa dyaryo nag nagkakahalaga ng daan daang libong piso.
Ikaanim, ang pagiging matulungin at mapagkawanggawa ni Madam Senyora Donya Gloria dahil sa lahat ng biyahe niya ay sinasama niya ang mga kawawang mga kongresista at opisyal na kaalyado niya. Tinitiyak niyang mag-eenjoy sila kaya todo bigay pa ng baon. Lahat ng gastos na ito, aba, galing sa kabang bayan.
Ikapito at higit sa lahat, sa walang humpay niyang biyahe ay nakikilala tayo sa mundo bilang pinaka corrupt, pinaka laganap ang iligal na droga, pinaka maraming napapaslang na mamamahayag at huwes at higit sa lahat pinaka magaling tumulong sa ekonomiya ng ibang bansa dahil kahit saan magtungo ay todo gastos hindi lamang sa hotel at pagkain kung hindi shopping dahil hindi nga naman pera nila ang kanilang ginagastos kung hindi ng bayan.