DAPAT PANAGUTAN NI MADAM GLORIA

Maraming nilahad si Pangulong Benigno “Noynoy” Aquino III tungkol sa mga gawain ng nakaraaang ni Madam Senyora Donya Gloria at ng kanyang mga pamilya, tauhan, kakutsaba at kakampi.

Tuwiran kong sasabihin na kulang pa ang mga nilahad na ito, marami pa ang matutuklasan ng mga bagong appointee ni P – Noy sa iba’t ibang ahensiya ng gobyerno.

Magalit na o magwala ang mga kakampi at kakutsaba ni Madam Gloria pero ang katotohanan ay ginawa nilang isang buong Mafia ang bansang Pilipinas, kung saan ang tongpats at iba iba pang uri ng kitaan ay nagmumula sa taas pababa ng pababa at walang pinatatawad ultimo mga maliliit na proyekto.

Kasama na riyan ang mga gawain ng mga local na ehekutibo na malalapit kay Madam Gloria kagaya na lang ng mga Barbers na sa kanilang huling ilang buwan ng panunungkulan sa Surigao ay ginawang Xerox ang pag-iisyu ng mining permit.

Ganundin sa Manila Waterworks Sewerage System na binulgar ni P – Noy na saksakan ng laki ang mga kinukubra ng mga miyembro ng board na pawing mga appointee ni Madam Gloria. Pakihalukay na rin ang isang kontrata riyan na halos kasabay ng ZTE – NBN deal na niratsa at pinaspasan. Huwag sana makalusot ito kaya nilathala na natin ngayon kahit na medyo kulang pa ang impormasyon na maibibigay natin.

Maraming marami pa hong iba. Talagang naging talamak ang nakawan dahil sa simpleng dahilan at iyan ay kung ang nasa itaas ay nuknukan ng ganid, paano mo sasabihan ang nasa ibaba na gumawa ng tama at bawal ang magnakaw.

Sana lang dumating ang panahon na panagutan ni Madam Gloria at ng mga alipores niya ang mga ginawa nilang kasamaan sa bayan lalo na ang pagsira sa lahat ng institution sa atin.

******

Ang pagsisiwalat ni P – Noy ng mga masasamang gawain ni Madam Gloria ay isang magandang pangitain para sa ating bansa.

Sa ginawa niyang pagbubulgar na ito sa kanyang kauna-unahang State of the Nation Address ay pinakita niya ang isang makakatotohanang larawan ng ating bansa na iniwan ng isang ekonomistang aral pa sa Estados Unidos na bangkarote.

Kahit paano ay malilinawan nating lahat ang tunay na kalagayan ng bansa na sana naman ay gumising sa ating lahat upang magkaisa at iahon ang bayan mula sa pagkalugmok na iniwan ni Madam Gloria at ng kanyang pamilya, kakutsaba, karancho, kakampi, kapartido at kasabwat.

Patunay rin ang pagsisiwalat niya na nais niyang ipakita ang isang tuwid na daan kumpara sa isang paliko likong daan. Kahit ano ang sabihin ninyo, sa mga unang hakbangin ni P – Noy katulad ng hindi paggamit ng wangwang at ang pag-amin sa tunay na kalagayan ay senyales na sinsero ang ating Mahal na Pangulo at nasa tama ang kanyang puso.

Tulungan natin siya at wala tayong makitang dahilan bakit hindi uusad ang ating bansa.

KOLEKSYON NG BUWIS AT DAGDAG BUWIS

Bangkarote ang ating pamahalaan, pasalamat kay Madam Senyora Donya Gloria at mga bataan niya na walang iniwan maliban sa utang sa iba’t ibang sangay ng pamahalaan.

Sa huling paningin ni Finance Secretary Cesar Purisima, ang budget deficit natin ay maaaring umabot sa 200 Bilyong piso para sa taong ito.

Dahil diyan ay asahan natin ang matinding paghihigpit ng sinturon ng administrasyon ni Pangulong Benigno “Noynoy” Aquino III. Sa mga biyahe pa lamang ay malaki na ang matitipid ng bayan at asahan nating walang mga gastusang walang kapararakan gaya ng mga $20,000 na kain ni Madam Gloria at kanyang mga tauhan sa Estados Unidos nuong nakaraan.

Ngayon pa lang, tiyak nating hindi ito gagawin ni P – Noy dahil ang pamilya niya kailanman ay hindi naging magarbo at naging simple ang pamumuhay. Pinakita ito ni Pangulong Tita Cory na kahit kelan ay hindi natin nakitaan ng pang-aabuso.

Ganuon din ang mga kapatid ni P – Noy at siya mismo nuong kongresista at senador pa lamang siya. Gaya ng lagi nating sinasabi, kung simple ang pamumuhay hindi magiging ganid.

Anyway, bago tayo lumayo ng husto, isang paraan upang makatulong tayong lahat ay magbayad tayo ng tamang buwis. Pakiusapan natin ang mga kababayan nating mga negosyante, professional at iba pa na magbayad na sana tumulong upang kahit paano ay maibsan ang paghihirap ng bayan.

Hindi kagaya nuon na isa tayo sa nagsasabing hindi dapat magbayad ng buwis dahil ibubulsa lamang ng mga corrupt na opisyal ng nakaraang administrasyon, ngayon ay obligasyon natin na tumulong dahil tiyak naman ang binabayaran nating buwis ay mapupunta sa serbisyo ng bayan.

Sa medaling salita, makikinabang naman tayong lahat sa buwis hindi kagaya nuon na nakikinabang lamang ay bulsa ng mga corrupt.

******

Isa pang dapat pagaralan ng ating mga opisyal ay paano gagawing simple ang paraan ng pagbubuwis. Masyado kasing kumplikado ito at nagiging dahilan tuloy ng corruption ng ilang kawani ng BIR at Bureau of Customs.

Nuon pa man, sinasabi natin na mas medaling magbayad kung sisimplehan ito. Magisip sila ng simpleng paraan upang ang mga doctor, inhinyero at iba pang professional ay mapatawan ng tamang tax. Alam naman natin na ang mga doctor, lalo na ang mga surgeon sa malalaking ospital ay kumikita ng malaki pero dahil sa gulo ng taxation natin ay nagpapalusutan sa tulong na rin ng mga taga BIR.

Ganundin ang mga vendor na bagama’t maliit lamang ay kinikita ay sana magbayad ng maliit ring buwis. Dapat kasi, mahirap mayaman ay nagbabayad ng tamang buwis.

Sa kasalukuyan, mga katulad lamang natin ang nagbabayad dahil pagtanggap natin ng suweldo ay kaltas na ito.

Maganda siguro pamarisan natin ang sistemang ng pagbubuwis ng ibang bansa kung saan may mga tinda na kahit walang resibo ay pinatawan na ng buwis mula sa manufacturer. Simpleng paraan ito upang hindi pahirapan ang mga kababayan nating may maliit na tindahan sa palengke.

Kayo mga kaibigan, bigay kayo ng suggestion niyo at ilalathala natin.

MULING PANINIRA KAY SEN. LACSON

Tahasan kong sasabihin na tiyak kong wala kinalaman si Sen. Panfilo “Ping” Lacson sa kasong Dacer – Corbito. Nasa ilang lumang pahayagan ho na isa ako sa huling tinawagan ni Ginoong Bubby Dacer. Personal ko ho siyang kaibigan at kung totoo ang mga pinagsasabi ng mga naninira kay Sen. Lacson na may away sila ni Dacer ay maikukuwento niya sa akin.

Katunayan, ang malinaw na sinabi si akin ni Bubby ay “brother – ayos na kami ng primo mo (dating Pangulong Erap).” Nagkaroon ho ng hindi pagkakaunawaan si Bubby at si dating Pangulong Erap. Sa aking pagsisiyasat ay natuklasan kong tungkol ito sa paninira ng ilang negosyanteng malalapit kay Pangulong Erap na si Ginoong Bubby ang siyang pinagmulan ng mga negatibong balita tungkol sa kanya lalo na sa iskandalo ng BW Resources.

Bago ho mawala si Ginoong Dacer ay madalas ako sa opisina niya sa Manila Hotel. Dekada 80 pa lang magkaibigan na kami at halos linggo linggo nagkakausap kami. Open ho si Ginoong Dacer kaya sino man ang nakakabangga niya nuon naikukuwento niya sa atin. Ni minsan hindi niya nabanggit si Sen. Ping.

Personal ko rin hong kaibigan si Sen. Ping at harapan ko siyang tinanong tungkol sa isyu na ito taon na ang nakaraan. Tuwiran niya akong sinagot na wala siyang kinalaman at naniniwala ako sa kanya.

Isa ang tiyak, ang abogado ni Cesar Mancao ay abogadong bigay ng nakaraang administrasyon na lubos na nasaktan sa mga bira ni Sen. Ping gaya ng Jose Pidal, ZTE – NBN at marami pang iba.

Paalala rin natin ang text message na pinadala ni Mancao kay Sen. Ping taon na ang nakaraan kung saan sinabi nito na “kinukumbinsi” siya ng mga bata ni Madam Senyora Donya Gloria na umuwi at magsilbing pekeng testigo laban kay Sen. Ping.

Isa pa ay super linaw na kasinungalingan ang sinabi ni Mancao na lima sila sa sasakyan ni Sen. Ping ng magbigay ito ng utos para kay Bubby. Ako ho nakasakay na sa sasakyan ni Sen, Ping. Parang opisina ho ito, imposible kayong sumakay diyan ng lima kayo dahil sa dami ng papeles. Pinakamarami na siguro ay siya, driver niya at isa pa gaya nuong nakasakay ako sa kanya minsan.

Alam kong matinding lungkot at nararamdaman ng mga anak ni Bubby pero sana hindi sila maggamit ng mga galit kay Ping na lahat yata ng tinatalaga sa puwesto ni Pangulong Noynoy ay tauhan raw ng senador.

Ultimo mga kaibigan ni Sen. Ping na hindi naman naitalaga sa anumang puwesto at alam nating hindi ma aappoint ay dinadamay ng mga text brigade na obvious galing na naman sa mga kampon ng dating administrasyon.

Ang isyu rito ay simpleng simple lamang – si Sen. Ping ang una at palaging nagbubulgar ng bulok ni Madam Gloria at mga kakampi niya na siyang dahilan bakit marami sa bilyong bilyong kikitain nila ay napurnada. Hindi nila siya mapapatawad.

Puwera pa riyan ang mga pulis na tinanggal niya, napakulong niya o inalisan niya ng trabaho ng hepe siya ng PNP. Marami sa mga corrupt na iyan ay naging tauhan ni Madam Gloria.

Iyong tungkol naman sa pagharap niya sa kaso, naniniwala ako malapit na siyang umuwi at malilinawan na natin ang lahat.

JUETENG AT IBA PANG SUGAL

Lunes ho ng umaga ay narinig nating iniinterview si dating Pangulong Joseph “Erap” Estrada sa DZMM tungkol sa isyu ng jueteng.

Patuloy ang paniniwala ni Erap na dapat gawing legal ang jueteng at isa sa dahilan niya ay paano naman ang mga kubrador, kabo at ilan pang mga umaasa sa jueteng.

Isa pang dahilan niya ay bakit daw iligal ang sugal ng mahihirap samantalang ang sugal ng mga mayayaman gaya ng mga laro sa loob ng casino ay legal.

Sa puntong una, tama siya na marami ang magugutom sa mga kubrador, kabo at ilan pang nakikinabang sa jueteng kung aalisin ito pero kung ang pamahalaan ay tutulungan ang mga kasali rito upang matuto ng ibang trabaho ay maaaring tuluyang alisin ito.

Hindi komo marami ang magugutom ay papayagan na lamang natin ito. Para nating sinabi na payagan na natin ang ibang mga iligal na gawain dahil magugutom ang mga gumagawa ng mga iligal.

Ang dapat nating tandaan, ang anumang bagay basta iligal ay iligal period.

Kung tungkol naman sa mga casino, naniniwala tayo na dapat sarhan ang lahat ng casino o di kaya’y pagbawalan lahat ng kababayan natin na maglaro diyan.

Maaaring payagan lamang ay ang dayuhan na nais talagang waldasin ang kanilang salapi. Marami niyang mga high roller gaya ng mga namamasyalan sa Fontana sa loob ng Clark sa Pampanga at sa Port Irene sa Cagayan Valley.

Bagama’t naninindigan akong masama ang sugal, pagbigyan na natin ang mga dayuhan na ubusin ang mga salapi nila dito sa atin.

Tiyakin lamang natin na wala tayong kababayang nagsusugal lalo na mga nalulungkot na asawa ng mga overseas Filipino workers na sa paglilibang ay inuubos ang mga salapi sa slot machines sa loob ng iba’t ibang casino na nagkalat dito sa atin dahil sa walang humpay na pagbibigay ng permiso ni dating Pagcor Chief Ephraim Genuino.

Siyanga pala, sa mga may kamag-anak na sugapa sa sugal, meron hong patakaran sa casino na irereport niyo lang sila at babawalan silang pumasok sa mga lugar na ito.

Sa kabuuan, masama ang sugal at sana lahat tayo ay pigilan ang sarili, mga anak, kamag-anak at kapamilya sa napakasamang bisyong ito.

******

May ilang text messages tayong natanggap na nagagalit sa atin bakit daw hanggang sa mga nakaraan nating column ay patuloy nating tinutuligsa si Madam Senyora Donya Gloria.

Ang mga taong ito na obvious ay mga kampon ni Madam Senyora Donya Gloria ay nagkakamali kung iniisip nila na komo wala na siya sa Malakanyang ay kakalimutan na lamang ang kanyang mga kalokohan at ninakaw.

Ang kasalanan natin nuong araw na kakalimutan na lamang ang mga katiwalian ng isang taga gobyerno basta mawala siya sa puwesto ang dahilan bakit dumarami ang mga corrupt.

Hindi komo natanggal na sa puwesto ay papatawarin na lamang. Kailangan sa kanila ay parusahan upang hindi tularan.

Kailangan rin silang pagbayarin para hindi pakinabangan ng pamilya nila ang ninakaw nila. Ang ginawa nilang kawalanghiyaan ay nagpapahirap sa ilang henerasyon ng ating bayan at hindi dapat ibaon na lang sa limot.

SALA SA INIT SALA SA LAMIG

Daming reklamo ng ilan sa ating mga kababayan at wala pang isang linggong nauupo bilang bagong Pangulo si P – Noy ay tuligsa na ng tuligsa.

Ultimo ang pagiging late niya dahil ayaw niya gumamit ng wangwang at dinaranas niya ang matinding trapiko ng Metro Manila gaya ng iba nating mga mamamayan ay ginagawang isyu ng ilang mga ipokrito.

Banat rin ng banat ang iba tungkol sa mga taong nilagay sa puwesto ni P – Noy na hindi pa man nasusubukan ay hinahanapan na ng butas.

Ganuon din ang ilan na rally dito at rally ruon.

Kung gagamitin niya naman ang wangwang dahil puwede naman bilang Pangulo ng Pilipinas ay sasabihin naman ninyong abusado at sumira sa sariling salita.

Ganundin kung hindi maglalagay agad ng mga kapalit ng bataan ni Madam Gloria sa mga sensitibong puwesto, sasabihin namang bakit wala pang pinapalit.

Maawa naman kayo hindi kay P – Noy kung hindi sa bayan natin. Hindi na natin malaman saan tayo patutungo dahil ayaw natin bigyan pagkakataon ang bagong liderato na gawin ang nais nilang gawin.

Kung maglalagay ng dating mukha sa posisyon ay sasabihin niyong lumang mukha, kung bago naman ay sasabihin niyong bakit bago ang niluklok. Aba, kahit na sino maguguluhan sa inyo.

Pinakamaganda sa mga pinataserong ipokritong mga ito ay bumili kayo ng sarili niyong isla at para madagdagan ang kaligayahan ninyo ay dalhin niyo ruon si Madam Gloria at gawin niyong Pangulo.

Tingnan lang natin kung hindi magsisi kayo at dali dali kayong babalik ng Pilipinas.

******

Nananawagan ang marami sa ating mga kababayan na isunod sana sa kampanya upang maayos ang trapiko ang pag-aalis ng mga colorum na bus, taxi na doble doble ang plaka at mga bastos na tricycle.

Marami ho tayong mga text na natatanggap upang makiusap rito.

Tandaan ho kasi natin na bukod sa mga naghahari harian sa kalye na mga may wang wang ay sanhi rin ng matinding traffic ang mga bus, jeep, tricyle at mga taxi drivers na walang disiplina.

Isa ho ako sa naniniwala na hindi kailangan ng color coding basta lamang ipatupad ng tama ang batas trapiko at hulihin o parusahan ang dapat hulihin.

Sana isunod ito dahil ang paggaan ng trapik ay isang matinding tulong sa ating lahat bukod pa sa malaking tipid sa gasoline at krudo na naaksaya sa mga nakabinbing mga sasakyan.

******

Kailangang rebisahin ang mga midnight contracts na pinalulusot ng ilang mga opisyal nba naiwan ni Madam Gloria, kasama na ang sa Ninoy Aquino International Airport, Manila Waterworks Sewerage System at iba pang sangay ng gobyerno.

Kasama ho sa mga midnight project na lumusot ay isang proyektong karugtong ng ZTE – NBN sa MWSS na komo mas maliit ang halaga ay naaprubahan na.

Sana mapigilan ito gaya ng mga project sa airport na daang milyon ang halaga at tinutulak ng dating pamunuan.

Marami pa hong iba at habang natutuklasan ng mga pinalit ni P – Noy ay isisiwalat ng media.

HANGGANG BUTO ANG KASAMAAN

Nuong manumpa si Pangulong Benigno “Noynoy” Aquino, III o P – Noy bilang bagong pinuno ng ating bansa ay nakaramdam tayo ng konting awa kay Madam Senyora Donya Gloria.

Naisip natin na hindi kaya siya nagsisisi at bababa siya bilang isa sa pinakamumuhiang Pangulo ng sambayanan. Tandaan natin na nuong matatapos na ang kanyang termino ay walo sa sampu o 80% ng kababayan natin ay nais na mawala na siya sa Palasyo.

Malungkot kasi sa isang tao na ultimo mga dating kasama o pinamunuan ay sinusuka ka.

Ito ang mga naisip natin nuon, lalo na nuong nagboo ang mga nanunuod ng Inaugural address ng papaalis na si Madam Gloria.

Pero kinabukasan, o isang araw matapos ang panunumpa ni P – Noy ay bumalik at galit natin kay Madam Gloria ng walang kaabog abog na nagpasok ito ng panukala sa Kongreso na nais baguhin ang ating Saligang Batas.

Sa ginawa niyang ito, isa ang pinakita ni Madam Gloria at iyan ay kahit kalian hindi siya magbabago. Hindi niya nanaisin mabago man lang ang pagtingin sa kanya ng sambayanang Pilipino. Sa Wikang English – no redeeming values. Hopeless siya. Nais talagang manggulo upang mula sa unang araw pa lamang ng panunungkulan ni P – Noy, tunay na halal ng bayan ay sinasabotahe niya na.

Dagdagan pa niya ang walang tigil niyang pang-aabuso gaya ng hindi pagbabayad sa North Luzon Expressway at todo wang wang pa ang convoy niya papunta at pabalik ng Pampanga.

Talagang masama, hanggang sa buto at kasamaan. Nakakalungkot, isa pa naming babae pero bakit ganyan. Tama ang kapatid kong si Jade, anak siya ni ???. Hindi ko

Sana lang habulin siya ng batas at pagbayaran niya ang lahat ng kawalanghiyaang ginawa niya sa sambayanang Pilipino.

Abangan ninyo sa mga susunod na araw ang mga iniwang suliranin at kawalanghiyaan ni Madam Gloria sa iba’t ibang departamento ng gobyerno ng ngayon ay sasaluin ng sambayanan.

******

Karaniwan sa mga bagong Pangulo ay binibigyan ng panahon ng honeymoon sa unang 100 araw ng kanyang panunungkulan.

Ganundin ang inaasahan nating ibibigay ng mga miyembro ng media at iba pang mga grupo kay Pangulong Benigno “Noynoy” Aquino, III o P – Noy na wala pang isang linggong nanunungkulan bilang bagong pinuno ng Republika ng Pilipinas.

Pero hindi ito ang nangyayari ngayon. Mula sa unang ilang araw niya sa opisina ay hindi siya tinitigilan ng mga talunan at mga magugulong mga tao.

Isipin niyo naman, hindi pa nga siya literal na nakakaupo ay may nagrarally na sa Malakanyang. Mga magsasaka daw na taga Hacienta Luisita pero ng busisiin natin maigi ay mga professional rallyist na lahat ng administrasyon ay nirarally.

Pagbigyan sana nating lahat ng ilang buwan ang bagong Pangulo. Sumobra dami ng problemang iniwan sa kanya. Hindi kayang lutasin ito ng ilang araw o kahit ilang buwan.

Tandaan natin, kahit sa maliit na paraan ay pinakikita niya na hindi siya aabuso at malinis ang hangarin niya para sa bansa. Ultimo ang pagsunod sa trapiko ng kanyang convoy at pagalis ng wang wang ay patunay na ramdam niya ang pulso ng bayan.

Intindihin naman natin siya at tulungan. Hindi niya kakayaning solohin ito.

MAGANDANG SIMULAIN

Personal tayong nanuod sa Quirino Grandstand sa Rizal Park ng Inauguration ni Pangulong Benigno “Noynoy” Cojuangco, III at hindi ko maitatago na lubos na kasiyahan ang aking nadama lalo na ang mga binigkas niyang salita na wawakasan ang corruption, hindi papayag ang mga naghahari-harian at higit sa lahat ang “kayo ang boss ko.”

Ramdam na ramdam ko rin ang kagalakan ng marami ng tuluyan ng umalis si Madam Gloria. Matagal na panahong kalbaryo ang binigay nila sa sambayanang Pilipino.

Bagama’t aaminin ko na nakaramdam rin ako ng lungkot at awa dahil sumagi sa ating isipan na hindi kaya naisip ni Rep. Gloria Arroyo na kung napagbutihan lamang sana niya ang panunungkulan ay palakpak kesa boo ang narinig niya sa mga taong nanunuod. Bukod pa ito sa mga kasong kakaharapin niya sa mga susunod na mga panahon.

Magandang senyales rin ang ginawa ni P-Noy ng sinabi niyang bawal na ang wang wang, isang isyu na lubos nating kinatutuwa dahil sa matagal na panahon ng ating pagsusulat ay madalas nating batikusin ang mga abusadong opisyal at negosyante na walang ginawa kung hindi gumamit ng wang wang para lang hindi makaranas ng trapik.

Ang nakakatuwa pa ay ng pabalik na tayo sa sasakyan pagkatapos ng program ay dinig na dinig natin ang mga pulis na nagpapaalala sa mga kasamahan na “walang wang wang, walang wang wang.” Hehehe, sarap nito at sana magpatuloy ito.

Ang pagamin ni P-Noy na hindi niya kakayanin ang suliraning kahaharapin magisa ay isa ring malinaw na magandang ugali ng dating Pangulo. Hindi siya mayabang, siya ay mapagkumbaba at malinaw na nakaapak siya sa lupa.

Ang paghingi niya ng tulong sa sambayanan upang pasaning ang krus ay patunay rin na ang bagong administrasyon ay siyang makikinig sa hinaing ng sambayanan.

Sa ating bagong Pangulo, pangako natin ang ating tulong sa mga munting paraan kagaya ng pagsunod sa batas, pagbabayad ng tamang buwis, pagtatapon ng basura sa tamang lugar, pagsunod sa trapiko at tawiran sa kalye at iba pang mga bagay na kung lahat tayo ay magtutulung tulungan ay makakapagsaayos sa ating bayan.

Ihambing natin ang ating bayan sa walis tingting na kung magkabigkis ay hindi kayang baliin, hindi kayang wasakin. Ito ang kailangan natin ngayon at magandang simula ito para sa ating lahat.

Simulaing hindi lamang sa atin kundi sa ating mga anak, apo, magiging anak at magiging apo.

Sikapin natin mga kababayan na maiahon ang ating bayan sa kahirapan at maibalik natin ang dangal ng ating bayan. Sa husay at galing ng mga Pinoy sa pamumuno ni P-Noy pilitin nating abutin ang muli tayong tingalain ng buong mundo gaya ng paghanga nila sa atin nuong mga dekada 60.

Magandang simulain at tandaan natin, TAGUMPAY NI P-NOY, TAGUMPAY NG PINOY.

TAGUMPAY NI P-NOY, TAGUMPAY NG PINOY

Ngayong araw ay manunumpa bilang Pangulo ng Republika ng Pilipinas si Pangulong Benigno “Noynoy” Aquino, III o P – Noy.

Gagawin ang makasaysayang panunumpa sa Quirino Grandstand kung saan magbibigay wakas na rin ito sa isang madilim na yugto ng ating bayan kung saan binalot tayo ng corruption at kawalanghiyaan ng siyam na taon.

Magiging maikli pero deretso ang panunumpang gagawin ni P – Noy na asahan nating tutukoy sa mga nais niyang prioridad sa kanyang administrasyon.

Hindi natin tutularan ang iba na maraming suhestiyon at maraming payo sa ikalimang Pangulo ng Republika pero ang tanging alay natin ay pangakong sisikapin nating tumulong sa anumang paraan upang magtagumpay siya sa layuning mabigyan ng mas magandang kinabukasan ang sambayanan.

Sinama at isasama natin sa ating mga panalangin na lagi siyang gabayan ng PANGINOON upang mga tuwid at tamang desisyon ang gagawin niya na ikauunlad ng ating inang bayan.

Isa ang malinaw sa atin, ang tagumpay ni P-Noy ay tagumpay ng Pinoy. Kung mapaunlad niya ang Pilipinas, lahat tayo makikinabang.

Pangulong Noy dalangin namin ang pagasenso ng bayan at alam naming kailangan niyo ng tulong ng sambayanan upang magtagumpay.

Good Luck sa inyo Pangulong Noy at Good Luck rin sa ating lahat.

******

Iba’t ibang sector ang kinausap tungkol sa pagbabago ng liderato sa ating bayan at ito ang mga reaksyon nila.

Sa mga market vendors – alisin ang mga nangungurakot na pulis at MMDA na pagkaing isusubo na lang nila ay aagawin pa.

Sa mga driver ng jeep, bus, tricycle at iba pang mga pampublikong sasakyan – mawala ang pangongotong sa kanila at lipulin rin ang mga holdupper at magnanakaw.

Sa mga estudyante – maayos na classroom at libro bawa’t isa at walang gurong nagtitinda ng kung ano ano, nais rin ng magandang kalidad ng edukasyon na ibibigay ng tinuturing nilang pangalawang magulang.

Sa mga titser – dagdag na suweldo at maayos na paaralan kung saan kumpleto ang mga gamit at sapat lamang ang bilang ng mga estudyante. Hindi rin sana sila gamitin sa eleksyon kung saan sila ang pinagbubuntunan ng galit ng mga kandidato at botante.

Sa mga Overseas Filipino Workers at pamilya nila – dagdag na trabaho rito sa atin upang mapagisa na natin ang mga pamilya nila. Lubos na ang kanilang pangungulila sa mga magulang at anak. Matindi rin ang inaabot nilang hirap sa kamay ng mga dayuhang iba sa atin ang kultura.

Sa mga magsasaka – tunay na tulong mula sa pamahalaan, lalo na sa irrigasyon at pataba sa lupa. Dapat rin natin silang tulungang magtanim ng mga magagandang

Sa mga manggagawa – dagdag pasahod at proteksyon sa mga kumpanyang kontraktuwalization ang paraan upang wala sa kanilang maaaring maging permanente. Kailangan rin ng dagdag na benepisyo para naman kahit paano ay mabigyan ng maayos bagama’t hindi marangyang buhay ang kani – kanilang pamilya.

Mga illegal settlers – tunay na pabahay malapit sa kanilang mga pinapasukang trabaho at paaralan.

Mga mangingisda – totoong tulong mula sa pamahalaan upang ang kanilang mga nahuhuling isda ay makarating sa mga palengke ng maayos at hindi hinaharang at kinokotongan ng mga pulis. Isang maayos na hukbong pandagat na siyang pipigil sa mga pirata at mga dayuhang iligal na nangingisda at ating karagatan.

Mga sundalo at pulis – maayos na pasahod at tamang mga armas bukod sa benepisyo sa kanilang mga pamilya kung sakaling may mangyari sa kanila. Hindi rin sila dapat tinotokahan ng mga corrupt na opisyal at ginagamit sa pulitika.

Mga government nurses and doctors – maayos na ospital, kumpleto sa kasangkapan at mga gamot upang tunay na makatulong sa mga kababayan nating may sakit.

Sa ating lahat – isang pamahalaang unang prioridad ay ang sambayan.